La concepción democrática de Javier Rojo, Presidente del Senáu.

 

Acabo de sosprendeme lleendo les declaraciones del Presidente del Senáu, Javier Rojo, nes que se refirió a la propuesta realizada polos senadores nacionalistes de poder utilizar toles llingües del Estáu nel Senáu, indicando que son los votos los que ponen a cada iniciativa “nel so sitiu” anque indicando’l calter “respetable” de la mesma (que nun falte talante).

Detrás d’esti supuestu rixu democráticu, escuéndese una concepción dafechu autoritaria de la política, onde la mayoría puede anular los derechos de la minoría. Quiciabes pal señor Rojo utilizar la llingua materna nun ye un derechu a tener en cuenta, pero pa munchos ciudadanos y pa la Declaración Universal de los Derechos Humanos si lo ye.

Toos nos escandalizaríemos si los blancos, claramente mayoritarios nel estáu español, llindáremos los derechos a los negros y sedría tan cenciello como dicir que los negros fixeran propuestes “respetables” y de siguío indicar que los votos pondránla “nel so sitiu”. La democracia pasa inescusablemente por asegurar, independientemente del xuegu de mayoríes y minoríes, unos derechos fundamentales tanto personales, civiles como políticos.

Un problema de la democracia nel estáu español ye’l continúu usu de la mayoría pa torgar el desenvolvimientu de derechos de les minoríes. Sosprendente cuando’l PSOE ye un partíu que reconoz el matrimoniu homosexual y l’adopción por parte d’homosexuales (midida qu’aplaudo públicamente) y reconozlo como un derechu inalienable de toa persona como ye gociar de los mesmos derechos civiles, nesti casu’l matrimoniu, independientemente de la so condición sexual ¿llindaría’l PSOE’l derechu d’adopción de los homosexuales si la mayoría de los ciudadanos tuvieren en contra? y ¿daquién del PSOE s’atrevería a garantizame que la mayoría de los ciudadanos del estáu español tán a favor de l’adopción por parte d’homosexuales?

Esta forma d’actuar “fondamente democrática” nos derechos civiles de los homosexuales ensin embargu conviértese en “autoritarismu democráticu” en toles cuestiones nacionales que plantegen distintos partíos y organizaciones. Como ciudadanu del estáu español, tengo’l mesmu derechu a esixir falar na mio llingua materna nes instituciones onde dicen que se representa a tolos ciudadanos, independientemente del mio llugar de nacencia y ideoloxía.

Por mucho que-y cueste entendelo al máximu representante de la Cámara que diz representar la pluralidá de les nacionalidaes del Estáu, el derechu a falar na mio llingua materna nun se determina por mayoríes nin por minoríes, ye un derechu inherente al conceutu de ciudadanía y venceyáu a los derechos humanos fundamentales.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: