¿Un sistema políticu asturianu?

 

La salida de Cascos del PP y el so recuperáu arguyu por ser asturianu, abrió un exe de discursu nuevu na política asturiana, que se centraría na marxinalidad de Asturies nel actual panorama políticu estatal. Ye ciertu que Asturies perdió pesu políticu al mesmu ritmu que perdió pesu económicu, lo que xuníu a la mayor tasa d’emigración xuvenil de too l’Estáu y la perda de población, colocanos nos postreros puestos de toos el indicadores económicos, sacante en paru, básicamente porque somos esportadores netos de paru (la mentada emigración xuvenil).

Ensin metese nos verdaderos motivos de Cascos, que pal fin d’estes llínees ye indiferente, lo que sí ye ciertu ye que l’elementu central del alderique políticu ye Asturies, lo qu’ensin dulda ye una novedá sorprendente y altamente gratificante pa un nacionalista, d’esquierdes nesti casu, como’l qu’escribe.

Esti cambéu nel discursu, puramente coyuntural, puede tresformase en daqué estructural y xenerar un verdaderu sistema políticu asturianu. Pa ello tendría de dase otra condición, esistir opciones polítiques asturianistes/nacionalistes que puedan ser una opción de votu “realista” pa un porcentaxe significativu de les asturianes y asturianos.

La esquierda nacionalista lleva tiempu plantegándose un procesu de reunificación pa xenerar tal opción electoral. Les dificultaes derivaes de plantegar una estratexa conxunta dende organizaciones que tuvieron distintes evoluciones plantega les sos dificultaes, porque a pesar de ser organizaciones de calter testimonial a nivel electoral, la so presencia política n’actos, apaición en prensa, etc. amuesa qu’esiste tantu un trabayu importante como una estructura que funciona, y el cambéu neses dinámiques siempres ye difícil.

El principal hándicap d’esti procesu ye l’ausencia histórica nes instituciones, a pesar de qu’anguaño Roberto Colunga ye diputáu autonómicu pol Bloque por Asturies y la presencia de distintos conceyales que se mueven nesti ámbitu políticu, y la falta d’un candidatu conocíu, lastren les posibilidaes electorales del nacionalismu d’esquierda pola incidencia decisiva de los medios de comunicación, onde la presencia ye bien residual nos asturianos y nula nos estatales.

La derecha asturianista/rexonalista representada pol PAS y URAS (anguaño coalicionados n’Unión Asturianista), que se autodenominan asina respectivamente, vivió’l “tsunami” de Cascos que cola so recuperada asturianía y la más que probable presencia electoral d’una opción encabezada por él mesmu, usurparía en bona midida los votos d’estes opciones polítiques.

Esta situación plantega la posibilidá d’una opción asturianista/rexonalista qu’unifique toes estes families entorno a la figura de Cascos. El problema equí ye’l contrariu al de la esquierda nacionalista, l’ausencia tantu d’un trabayu políticu como d’una presencia en medios de comunicación (quitando al Presidente del PAS, Xuan Xosé Sánchez Vicente que pola so talla intelectual y política caltien una presencia constante nos medios asturianos, anque d’una forma bien personal ensin que se vea trabayu organizativo).

Ensin dulda los recursos económicos d’esta opción van ser importantes, pero a pesar de les “deserciones” del PP pa dise con Cascos, a cinco meses de les elecciones ta claro que la falta d’organización constitúi un hándicap importante.

Quiciabes l’elementu básicu que determine la xeneración d’un sistema electoral asturianu al llargu plazu ye que trunfe un discursu que vamos llamar de forma xenérica asturianista, qu’entienda a Asturies como suxetu políticu con una realidá política, social y económica estremada de la estatal, o por contra trunfe en discursu “covadonguista”, onde Asturies como má abnegada de la verdadera España, tien qu’asumir en primer persona los sacrificios por que la so fía vuelva al bon camín y pierda los vicios que la lleven a la so propia perdición.

El trunfu d’una nueva reconquista, onde la verdadera derecha reorganizase pa llevar la pureza al restu d’España, convertiría al “efectu Cascos” nuna mera etapa de la vieya guardia del PP contra la cúpula del partíu, colo qu’una vegada trunfe o fracase tal operación, “l’asturianía” de dalgunos convertiráse no que siempres foi, españolismu puru y duru.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: