El discursu del candidatu a la Presidencia d’Asturies, Francisco Álvarez Cascos

Pocos discursos llevantaron tanta espectación como’l discursu de Cascos como candidatu a la Presidencia d’Asturies, cuidao que para bien o pa mal, tamos falando del cambéu políticu más importante nel nuesu país dende la llegada de la democracia. Pero la espectación foise convirtiendo en decepción a la mesma velocidá que’l candidatu a la Presidencia foi desendolcando’l so programa de gobiernu, qu’anque en llínea col so programa electoral escoró muncho más a postures conservadores, viose un perfil asturianista bien baxu o  nulu y con un nefastu programa en materia de medioambiente. Finalmente, echóse de menos un discursu xovellanista del que tanto presumió Cascos en campaña.

Tampoco tou puede ser crítica, yá que nun sería xustu, y ente los aspeutos positivos caben destacar un apueste pola trasparencia del sector públicu, más que necesaria ante l’actual situación de caciquismu institucional apadrinada pol PSOE ya IX, la eliminación de paraadministración pública yá que tamos falando d’entidaes que realizaben grandes gastos con un gran oscurantismo tantu nes sos funciones como na so xestión interna, un calter reivindicativu frente a los gobiernos centrales de vez que tantos asturianos echamos de menos estos últimos trenta años de democracia y finalmente, una sensación de cambéu nuna clase política acomodada nel status quo, que vio como esi status quo saltó pel aire y entá nun entiende’l motivu.

Pero sacando estes grandes traces, pocos más aspeutos positivos pueden llograse de mentáu discursu, plantegándose munches más solombres que lluces sobre les prioridaes del futuru gobiernu asturianu, y ente eses solombres gustaríame destacar les siguientes:

 1.  Un ataque a la sanidá y educación pública: una vegada más y de forma insistente, les opciones conservadores escuende so la llibertá d’elección de centru la esviadura de fondos públicos del sector públicu al priváu. Económicamente ye insostenible caltener los centros públicos y concertados n’educación, sacante nes grandes ciudaes, lo que supon amenorgar la inversión nel sector públicu frente a un sector priváu que pol so calter relixosu y de los sos docentes y auxiliares, esixe muncho menos gastu de personal, tresmitiendo la falsa sensación d’una meyor xestión, a lo que se xune a les innumberables irregularidaes en materia de selección d’alumnáu, recibiendo la educación pública un númberu enforma mayor d’alumnáu con necesidaes especiales, lo que lóxicamente fai más costosu l’actividá docente. En sanidá per otra parte, la llucha contra les llistes d’espera namá va llevar a esviar fondos a la sanidá concertada baxando los recursos de la pública, colo que se van aumentar nuevamente les llistes d’espera y asina sucesivamente hasta acabar cola sanidá pública.

2. Polítiques fiscales regresives: la eliminación del impuestu de sucesiones ye ensin dulda una de les mayores amueses del conservadorismu d’Álvarez Cascos, yá que tamos falando d’un impuestu que grava fundamentalmente a patrimonios medios y altos. Tenemos De tener en cuenta que si un descendiente herieda una casa que foi la vivienda habitual del fináu/a y un dineru, el casu más común, la principal fonte de tributación ye la vivienda, que ta exenta al 95%, colo que l’impuestu ye bien asumible. Per otra parte, ye un impuestu bien gravoso pa heriedos importantes, colo que la formulación del impuestu en Asturies yera bien progresiva y solidaria. Per otra parte refúgase la fiscalidá verde, entá en pañales nel nuesu país, cola eliminación del céntimu sanitariu lo que ye un erru doblemente grave, amenorga los ingresos públicos nuna situación de falta de financiamientu y un sector priváu en retrocesu y nun encara la necesidá de cambéu nel modelu de tresporte y enerxéticu, dáu’l baxu usu del coche compartíu y del usu de tresporte públicu, una de les víes pa fomentar esi cambéu yera gravar precisamente l’usu del vehículu particular. Tamién resulta estrañu col compromisu col coche eléctricu que diz defender, porque tal defensa seria lóxica que s’acompañara de midíes que gravasen el coche tradicional, lo que significa o un giño cosméticu de política verde o una incoherencia más nel so programa de gobiernu.

3. Asturianismu: nin ta nin se espera, a cencielles anecdóticu, a cencielles decorativu, a cencielles inesistente. Como munchos denunciamos y esperábamos, l’asturianismu de Cascos yera coyuntural y comenenciosu, y agora dende’l gobiernu, lo qu’evidentemente yá dexa una diferenciación perclara sobre’l restu d’opciones, el so asturianismu jovellanista vuelve al sitiu onde Cascos nunca quixo que saliera, los llibros d’hestoria, anque lo precisara temporalmente dende un puntu de vista del marketing políticu pa estremase del PP. Eso sí, tien bien aprendida la llección del PSOE ya IX, y va caltener les ayudes necesaries por que’l sector qu’escribe y vive del asturianu, sigan faciéndolo ensin necesidá que l’asturianu sía una llingua normalizada y esixa competir y tener calidá (nun digo que nun haya calidá, digo que nun ye necesaria pa vivir del asturianu), y dependa d’unes ayudes que siempres “van atenuar” los escesos asturianistes”, anque llamento informar que tales “escesos asturianistes” acaldía van ser mayores, anque nengún de los grupos parlamentarios actuales echaren de menos una defensa de la nuesa llingua y cultura nel discursu del candidatu.

4 . Infraestructures: en bona lóxica Cascos reivindica’l so antiguu programa como Ministru de Fomentu p’Asturies, pero ye un programa fracasáu porque apuesta per un camín qu’acaldía más economistes denuncien como absurdu, infraestructures que se faen y depués piénsense pa qué les queremos. Lóxicamente, ye necesariu acabar l’autovía del Cantábricu, yá que a estes altures nun hai marcha tras y los retrasos son intolerables, pero l’AVE y el metrotren de Xixón, amuesen un empecinamientu por unes polítiques desarrollistas que namá desenvuelven los beneficios de les grandes constructores y xeneren déficit nes arques públiques, porque nun xeneren el dinamismu económicu que insistentemente reivindicar pa estes inversiones (namá ver el casu de l’AVE en Castiella-La Mancha, que yá se ve como una ruina y una verdadera hipoteca).

5 . Medioambiente: yá lo mentamos nel céntimu sanitariu y l’ausencia de tributación verde, pero l’apueste pola caza y la pesca amuesa bien a les clares que nun conoz el sector y la so nula esmolición pola protección de la biodiversidá. De casualidá les crítiques del sector pesqueru a les polítiques restrictives, convertir nuna campañes escelentes de captures de trucha y salmón, más curties eso sí, y demostró que la permisividad cola pesca condergar a la so desapaición, dende un puntu de vista puramente economicista, yá que tendría d’apostate por una política conservacionistas pa evitar riegos na sostenibilidá de les especies de los ríos. La caza en Asturies, tendría de tar fuertemente acutada, ante los problemes pa caltener especies autóctones (llobu, osu, urogallo) y paez inasumible criticar por casu que los llobos ataquen esplotaciones ganaderes (munches d’elles probablemente acusaciones falses) y dexar la caza por otru, recursu que tendría de garantizar la subsistencia de los llobos. Finalmente resálvase la protección de los derechos de los animales, otra de les llagunes de Cascos respecto al pensamientu de Xovellanos, activista yá nel S XVIII contra les corríes de toros y el tratu cruel a los animales, que consideraba incompatible con un mínimu humanismu y totalmente estrañes pa tierres como les asturianes.

 Por tou ello, podemos dicir que’l discursu de Cascos nun ye nin más nin menos que’l discursu del PP, onde una vegada superada les elecciones tantu’l “nin somos d’esquierdes nin dereches” (esactamente igual qu’UPyD), como’l so asturianismu jovellanista, cayeron del ideariu del candidatu a la Presidencia de Asturies, decepcionante, bien decepcionante.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: