Moriyón: alcaldesa en práctiques

Torna’l asturianu de la tribuna publicada n’El Comercio, el 29 de setiembre de 2011.

Pasaos cien díes dende tomar de posesión de Carmen Moriyón como alcaldesa, faise patente que tomar la política como un ‘hobby’ ye una clara irresponsabilidá. L’ésitu electoral de Foro en Xixón el 22 de mayu foi indiscutible. Ensin ser quienes a vencer en númberu de votos al todopoderosu PSOE xixonés, llogró ser la segunda fuerza más votada – daqué más que meritorio – y, sobre manera, pudo ufiertar una opción de gobiernu conservadora bien amplia que, col sofitu del PP, frañó la hexemonía histórica del PSOE na ciudá, con o ensin el sofitu d’IX. Una de les proclames de Foro foi defender que la so candidata, y actual alcaldesa, nun yera una profesional de la política y que gociaba de gran prestxu como ciruxana, dambes cuestiones indiscutibles. Lo que, sicasí, ye discutible ye que la falta d’esperiencia política sía daqué positivo. Ye cierto que la política nun puede ser un cotu priváu de los profesionales de los partíos y que tendríen d’esistir midíes lexislatives muncho más concretes y contundentes porque’l mandatu constitucional qu’obliga a qu’esista democracia interna nos partíos dexe de ser un meru brinde al sol. Tamién ye cierto que la esperiencia política nun tien por qué llograse nos partíos políticos nin na Alministración pública, yá qu’esisten munchos ámbitos onde una persona puede llograr esa esperiencia.

Dende Bloque por Asturies-UNA Xixón apostamos nes postreres municipales por anovar la política de la ciudá, y pa ello incorporamos a munches persones que dexaren de participar o nunca participaren na política institucional. Pero toes elles teníen bien demostráu un compromisu con Xixón en distintos ámbitos sociales, sindicales o del asociacionismu que queríemos que se reflexara na política municipal. Dende esta filosofía, difícil ye confiar nuna persona pa la que’l so compromisu cola ciudá, fora del so ámbitu profesional, ye verdaderamente desconocíu por inesistente. Asina, tenemos una alcaldesa en práctiques, non por ser novata nel cargu, sinón por nun tener nenguna esperiencia política nin interés previu conocíu pola mesma. Y claro, eso nótase.

El primer pasu de Carmen Moriyón foi cargase d’un golpe tola representación de la oposición (PSOE ya IX) nes empreses municipales, alegando que, amás de faelo fatal cuando les xestionaben, podíen resultar cafiantes a la hora de facer cambios nel modelu de xestión. Señora alcaldesa, la oposición cafiante – amás tolo que puede – yelo cuando ve coses coles que discrepa. Eso llámase política. Una de les sos funciones ye garantizar la representatividá de la ciudadanía de Xixón. Gústenos o non, el PSOE foi’l partíu más votáu pola ciudadanía xixonesa. Depués, vinieron les esperpénticas declaraciones sobre la feria taurina de Begoña, onde llegó a declarar la fiesta sagrada, non porque Foro sofite tal eventu, lo que per otra parte contradiz el so calter asturianista y de fieles xovellanistes, que ye totalmente lexítimu, sinón porque argumentó dende les sos preferencies personales y los sos gustos; pero taba falando como alcaldesa, un conceutu que paez nun entender. Nun puede dir poniendo y quitando eventos poles sos pasiones, como declaró, sinón por motivos d’interés públicu y de tipu xeneral.

Tola so argumentación en defensa de los toros sirviría esactamente igual pa defender la Selmana Negra, na que participen munches más persones y con una incidencia na ciudá enforma mayor, anque esti eventu nun paez que sía del so presto. En política, los argumentos, idees, programes y demás nun sirven pa usté. Nun ta falando con unos amigos cuando fai declaraciones, señora Moriyón, representa a una ciudá, y les sos pasiones, ensin ánimu d’ofendela, tráennos ensin cuidu. Queremos saber en qué se basa pa sofitar un eventu sí y otru non.

Tamién desafortunaes fueron les sos declaraciones sobre la incineradora, onde, amás de volver demostrar que lo que defendía en campaña yera meru marketing (oponese a ella nun primer momentu y depués llavase les manes), darréu amosó los sos nulos conocimientos sobre’l casu al afirmar que’l vertideru acabábase, cuando, en realidá, aprobóse la so ampliación. Tamién comentó les llimitaciones pal tratamientu de los resíduos del recicláu. Mientres n’Austria se recicla’l 70%, n’Asturies nun llegamos al 10%. La capacidá de la incineradora de Serín ye desproporcionada y namás va ser rentable si importamos basura d’otres zones del Estáu.

Finalmente, ta l’asuntu del so oficiu. Ensin entrar n’alderiques llegalistes sobre si puede operar o non nel so tiempu llibre – rescampla que non -, el problema ye que nun asume’l costu de la vida política. Sí, ye un fastidiu, eso hai que tenelo claro. Asuma, señora alcaldesa, que dientro de cuatro año va ser una ciruxana peor, menos preparada y desconocedora de les nueves técniques, y si nun pasa eso, namás quier dicir una cosa: que nun se tomó en serio’l so cargu.

La política como ‘hobby’ devuélvenos a la dómina de los nobles, onde los asuntos públicos tratábense dempués d’iguar los propios, onde lo público siempre diba tres les necesidaes y pasiones de cada notable y onde’l pueblu namás yera un meru acompañante al que nun se-y esplicaba les razones de lo que se faía y muncho menos teníase-yos en cuenta.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: