Práctiques non llaborales n’empreses: la llegalización de la esplotación de la mocedá

El PSOE despidise del gobiernu a lo grande, aprobando el día antes de les elecciones les Práctiques non llaborales n’empreses (RD 1543/2011 dy 31 d’ochobre publicáu nel BOE de 18 de payares de 2011). Básicamente la idea ye que los mozos de 18 a 25 años trabayen de trés a nueve meses por 80% del IPREM (Indicador Públicu de Renta d’Efectos Múltiples), que falando en plata son 425,77 € mensuales.

Lo más tarrecible nun ye l’apueste indisimulada del PSOE poles salíes neolliberales a la crisis, si los mozos casi nin cobren contrataránlos más qu’a los mayores pero ,¿qué puestu de trabayu va crear nuevu? y ¿si sustitúi a trabayadores con salarios “normales” y produzse una baxada del consumu? Entrugues que yá respondiera l’anterior reforma llaboral, amenorgar salarios y derechos trai menos crecimientu económicua y más paru, porque la única salida a la crisis ye l’aumentu de l’actividá productiva, lo qu’esixe polítiques intervencionistas que compensen la paralización total de mercáu productivu y financieru.

Pero entá más grave de too esto, de por si pergrave, ye l’ausencia total de regulación d’estes relaciones non llaborables, que lo converten nuna arma brutal en manos de los empresarios pa destruyir cualesquier política retributiva a los sos trabayadores, destaquemos dalguna sde les llagunes más flagrantes:

• Nun se señala’l máximu de persones al respective de la plantiya total que pueden tar con una relación non llaboral: polo tanto en trabayos pocu cualificaos, vamos poder atopar plantiyes con más xente con relaciones non llaborales que llaborales. Asina, la presión de negociación del empresariu que puede sustituyir a trabayadores por pseudotrabajadores que cobren 425,77 € mensuales y que cotizan muncho menos, va ser directamente brutal.
• Nun se señala cuántes persones con relaciones non llaborales pueden pasar por un mesmu puestu de trabayu : anque s’indica que la duración d’estos non contratos va de trés a nueve meses, nada diz si un puestu de trabayu concretu pue tar cubiertu permanentemente por estos non trabayadores. Por poner un exemplu, si nel puestu de reponedor un supermercáu puede o non dir contratando non trabayadores cada nueve meses, y asina amenorgar un puestu de trabayu (reponedor) por un non puestu de trabayu (una relación non llaboral de reponedor ). Ye verdá, paez un traballingües, pero non de los que faen gracia precisamente.
• Nun se llinda nenguna modalidá de contratación pa incorporar a la empresa a una persona que tenga una relación non llaboral: vamos que si dempués d’un non contratu (9 meses), te meten un contratu en práctiques (2 años) con un 60% del salariu en primer añu y un 75% dy salariu el segundu añu, dempués de trabayar 2 años y nueve meses, nun tienes derechu a paru. A éstes tamién son compatibles coles práctiques obligatories pal llogru d’un títulu, modalidá típica en FPs, que suel durar 3 meses (qué casualidá 9 meses más esto s trés dannos un añín). Poro, faes les tos práctiques de FP nuna empresa, te proponen depués una relación non llaboral y darréu un contratu en práctiques, y con tou eso cotices dos años, nun llegues a cobrar el 100% del to salariu nunca y despidente ensin paru dempués de tres años.
• Nun se dexa esta modalidá a non empreses: unu yá puestu a esplotar, podía dexar a entidaes non empresariales contratar persones con esta modalidá, yá que según la norma l’oxetivu ye llograr esperiencia llaboral nos mozos, y que yo sepa ser alministrativu nuna empresa y una ONG, por poner un exemplu, da la mesma esperiencia. A lo menos, esa esplotación podría favorecer la realización d’actividaes sociales, respetando al máximu l’oxetivu de llograr empleabilidá pa la nuesa mocedá, pero que casualidá, eso nun se dexa, namá ye válidu pa empresarios. Esta disposición demuestra que se trata d’un amenorgamientu descaráu de salarios y que nada, o namá como un efectu secundariu, busca ameyorar la esperiencia llaboral de los mozos.

Finalmente, la esposición de motivos indica que “Esti Real Decretu foi sometíu a informe de […] les organizaciones empresarial y sindical más representatives”, lo qu’a lo menos inclúi a CCOO y UXT. ¿Daquién escuchó-yos poner al PSOE a cayer d’un burru por esta norma na campaña? ¿na situación electoral del PSOE, UXT y CCOO nun pudieron parar esta midida? Ellos nun pueden dicir que nun sabíen que diba salir esti nuevu non contratu, pero imaxino que como se publicar el 18 de payares, al otru día yera día de reflexón, y nun podíen opinar sobre esta nueva midida, conocida primeramente por ellos, porque romperíen la filosofía de tal día de reflexón, ye que los probes son tan democráticos …