A la fin, pagamos los de siempre

Torna’l asturianu de la tribuna publicada n’El Comercio, el 13 de xineru de 2012

 

Yá tán aprobaes les ordenances fiscales y precios públicos de Xixón pa 2012, y Foro plantegó una solución salomónica: conxelar impuestos y tases y aumentar l’IPC a los precios públicos. Asina vamos pagar más pol autobús o l’agua, pero vamos notar una conxelación nel IBI o contribución (más bien supon una neutralización de la xubida que correspondía p’anguaño acordies cola revisión de los valores catastrales realizada) y na viñeta del coche.

Foro, pa poder llevar alantre esta política, precisó’l sofitu d’IU p’aprobar la xubida de los precios públicos y, de la mesma, el sofitu del PP pa llograr la conxelación de los impuestos locales. Tanto IU como PP sofitaron midíes que concasen col so allugamientu ideolóxicu, pero que realmente nun dexen de ser un engañabobos, porque les polítiques recaldatories son globales y nun puede aprobase una parte de la mesma y depués negar l’efectu que supon el restu de partes d’esa política. Enforma cuando dambos grupos yeren conscientes enantes de la votación de que s’aprobaríen les propuestes de Foro gracies a esti votu cruciáu d’IU y PP.

Poro, la política recaldatoria del Conceyu de Xixón sofítase en treslladar la conxelación impositiva al traviés de xubir los precios públicos d’autobús, agua, etcétera. Nun hai que ser bien aviespáu pa dase cuenta de que les persones que más utilicen los servicios públicos (como l’autobús) nun suelen ser les clases más pudientes económicamente, mientree que l’IBI (la contribución) conxélase favoreciendo a les persones con más propiedaes. Y, inclusive, esaníciase’l recargu del 50% que gravaba a les viviendes vacíes, y de normal les persones que pueden dase’l luxu de tener viviendes vacíes, nun suelen tener demasiaos problemes económicos.

Asina, IU y PP son tan responsables d’esta política como Foro. El PSOE, que nin ta nin se-y espera, ve con esmolición una estratexa que va na mesma dirección de lo qu’ellos fixeron los últimos años, pero tarrecen que los ciudadanos, como si fuéramos xaronques, podamos saltar ante l’agua ferviendo, mientres que xubiendo la temperatura d’esa mesma agua adulces, como ellos diben faciendo, la ciudadanía casi nin lo percibiría.

Prestaríame centrame nun aspeutu concretu de la nueva regulación recaldatoria, como ye’l preciu de l’agua, pa entender los efectos perversos d’un sistema que, sofitáu pola esquierda y la derecha municipal, va aumentar la carga impositiva sobre los ciudadanos con menos recursos.

El Conceyu aprobó una xubida del preciu de l’agua (que va rondar el 3%), lo que se suma a la xubida que yá incluyó’l Principáu con una nueva tasa fixa de saneamientu, que supon 3 euros mensuales por vivienda. En principiu, toos precisamos utilizar agua independientemente de los nuesos ingresos. Sicasí, nun se contempla nenguna midida de tributación verde que premie’l consumu responsable y a la que se podríen acoyer aquelles families con más dificultaes económiques faciendo una contención del gastu d’agua. Ello dexaría un aforru económico a families con consumos más razonables. Midíes de mala aplicación en Xixón porque na mayoría de los casos los consumos nun tán individualizaos, sinón que son comuñales, lo que nun paez d’interés pa un conceyu con una alcaldesa que tien asumíes les competencies de Mediu Ambiente y con un grupu municipal que se llama IU-Los Verdes.

Más llamativo ye entá que se quite’l recargu del 50% del IBI pa les viviendes vacíes, que l’INE (Institutu Nacional d’Estadística) cuantificaba en 13.950 en 2001 (últimos datos disponibles). Tou indica qu’en 2011 van ser munches más. Namás el costu de caltenimientu de la infraestructura de la EMA (Empresa Municipal d’Agua) pa garantizar el suministru a 14.000 viviendes vacíes na nuesa ciudá, supera en demasía la xubida del 3% plantegada nel preciu de l’agua.
Colo cual rebaxemos los impuestos a un colectivu (les persones con viviendes vacíes) que supon un costu bien altu pa la EMA, por cuenta que caltener lo que nun s’utiliza sí ye tirar el dineru, y treslladamos la necesidá de financiamientu d’esta empresa pública a unos precios que nos afecten a toos per igual. Bueno, a toos non, porque los pisos vacios nun suelen consumir muncha agua, colo que la repercusión sobre los mesmos de la xubida de preciu va ser mínima, pero sí suponen, otra manera, repito, un costu bien altu pal sistema de distribución d’agua potable y sanitaria que pagaren tamién les families con más dificultaes económiques. Y, por si daquién nel Conceyu inda nun se dio cuenta, tamos en crisis, y la xente con pisos vacios ayudó a xenerar dicha crisis. Sicasí, nun la sufre como la persona que nun puede pagar l’agua.

Pero esti razonamientu podría usase pa les viñetes de los coches frente a la xubida del preciu del autobús, al fomentu del reciclaxe como métodu p’amenorgar la tasa de basura, al fechu de recargar a quien nun reciclen como tán faciendo otres ciudaes y un llargu etcétera.

Foro salióse cola suya: llograr un sistema recaldatoriu claramente conservador que garantiza los ingresos, mientres Izquierda Unida y Partido Popular aférrense a una cínica defensa de los sos modelos, falsa dafechu, porque los efectos en conxunto nin suponen un repartu xustu de les cargues ,como diz defender IU, nin llogra un amenorgamientu de la carga sobre la ciudadanía, como sostien el PP. Respectu al PSOE, nun sabe nun contesta.
Lo peor de too esto ye que, a la fin, pagamos los de siempre.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: