Si sal mal “yá lo dicía yo” si sal bien “veíase venir”

El II Congreso d’UNA y la so propuesta de crear un Espaciu Políticu Asturianu pa les eleiciones de 2011, que la so forma y concreción tendría qu’afaese colos actores qu’apostaren por esta propuesta, y con una forma flexible dependiendo de los estremaos ámbitos de los que falemos, disparó’l mundu “nacionalista-web asturianu” colos sos comentarios, idees, etc.

 Evidentemente, estos comentarios son contradictorios, caúnu curiosa pola so opción y sobremanera plantégense dende la soledá del cibernauta que nun participa viviegamente no que diz defender o apostar. Asina, de casi tolos comentarios vese un insoportable <<si sal mal “yá lo dicía yo” o si sal bien “veíase venir”>>. Lo que tola vida llamóse políticos “de chigre” ta convirtiéndose en “ciberpolíticos”, y l’inmensa mayoría d’ellos pa criticar y defender la so “visión” de la realidá, lo cual ye lexítimu cuando falamos de temes xenerales (nun sé, la paz mundial) pero desesperante y frustrante pa les persones que trabayen día a día por un proyectu y tienen una sensación (falsa na mayoría de los casos) de que la xente más interesada en tal proyectu, nada más quieren dinamitarlo.

 Mi primer comentariu ye pa les persones que trabayen día a día por un proyectu, ya que les crítiques que reciben dende la rede son “infundaes”, non porque tengan o nun tengan razón nos sos allugamientos, que sería lo de menos, si non pol desconocimientu del día a día, les dificultaes de llevar a cabu cualesquier acción colectiva, sobremanera dende la falta de recursos y tiempu na que se mueven casi tolos proyectos alternativos de sociedá. Pa mi, son estes persones les que tienen “drechu a equivocar” y les que van recibir el mio sofitu, apostando pola opción que más s’axuste a la mio visión de la realidá asturiana, non al aviesu, esperar qu’una organización afáigase a la mio visión de la realidá, lo cual amás d’imposible, namá demuestra una arrogancia infantil y un complexu d’inferioridá adolescente, qu’énte la imposibilidá d’enfrentase a razones defende les sos posiciones dende la soledá o dende’l grupu más íntimu d’amigos (ciberamigos nesti casu).

 Mi segundu comentariu va pa los “ciberpolíticos” que miren a les organizaciones pa dar la so opinión, ensin apurrir la so conocencia y esfuerciu (enormes como sabe cualesquier que participara en política) nel día a día, en xuntes, ellaboración de documentos, montando actos, colando carteles, etc. y tienen l’arrogancia de criticar a los que si faen y si trabayen.

 Y a toes estes persones qu’amosaron interés nel proyectu de crear un Espaciu Políticu Asturianu, pído-yos que suelten el tecláu y el ratón y avérense al colectivu que quieran qu’ente a formar parte d’esi Espaciu Políticu Asturianu, pa trabayar día a día nesi proyectu y en cuenta de criticar y dar lleiciones, escriban la so esperiencia del trabayu políticu real. Toi convencíu qu’asina, ayudaríen realmente a construyir una alternativa dende Asturies y pa Asturies.

 Homenaxe a Xune Elipe